زاگرۆس پۆست
لە دوو ڕۆژی ڕابردوو زیاتر لە ١٥٠ هێکتار لە دارستانەکان و لەوەڕگەکانی شاری سەردەشت، لە نێو بڵێسەی ئاگردا سووتا.
بەپێی ڕاپۆرتی گەیشتوو بە ئاژانسی هەواڵدەری زاگرۆس پۆست: زیاتر لە ١٥٠ هێکتار لە دارستانەکانی “مەلا شێخ، شینوێ، “بێزێلی” سەر بە شاری سەردەشت، سووتان و زۆرێک لە دار و ئاژەڵە کێوییەکانیش لە ناو چوون و زەرە و زیانێکی زۆری بەو ناوچانە گەیاندووە.
دەوترێت کە وێڕای داواکاریی ژینگە پارێزان و بەرپرسانی شاری سەردەشت، لە بەرپرسانی پارێزگای ورمێ، هیچ هەوڵێکیان بۆ یارمەتیدان و ناردنی کۆپتەر وماشینی ئاگرکوژێنەوە، بۆ شاری سەردەشت نەداوە.
دوای دوو ڕۆژ بە سەر ئاگرکەوتنەکە و زیان و زەرەری زۆر گەیاندن بە دارستان و ژینگە،ئاگرەکە لە لایەن هاوڵاتیان و ناوەندە مەدەنییەکانەوە، کۆنترۆڵ کرا.
لەم بارەیەو ژینگەپارێزانی شاری سەردەشت ڕایانگەیاند کە: “بەرپرسانی ڕژیم دەیانەوێت قوڵیی ئەم کارەساتە بە کەم نیشان بدەن تا نابەرپرسیاریەتی خۆیان بشارنەوە”.
ڕۆژی پێنج شەممە، ١٠ی گەلاوێژ، بەشێکی زۆر لە دارستان و لەوڕگەکانی گوندەکانی “مەلا شێخ، شینوێ و بێزێلی”، تووشی ئاگرکەوتنەوە بوون و زیاتر لە ١٥٠ هێکتار زەوینی ئاو ناوچانە لە ژێر بڵێسەی ئاگردا سووتا.
